Illa de San Simón. Poesía e historia.

 Como colofón a un curso cheo de lecturas e complicidades, os integrantes club de lectura, "O dondo colo do vento", puxemos rumbo á illa de San Simón. Esta viaxe no corazón da ría de Vigo non foi unha simple excursión, senón un auténtico paseo de aprendizaxe, convivencia e posta en valor da nosa memoria cultural. Acompañados por unha xornada radiante, desfrutamos dun sol espléndido nesta paraxe tan singular.

Nesta xornada transformamos a Illa de San Simón en memoria viva a través da palabra. Nun ambiente de profundo respecto, fomos desfiando e recitando diversos poemas centrados na liberdade, a xustiza e a paz. As voces dos nosos lectores uníronse para dar vida aos versos de autores inesquecibles como Miguel de Cervantes, Xela Arias, Manuel María ou Celso Emilio Ferreiro, cuxo eco resonou con forza fronte ao mar.

Esta última actividade deixa testemuño do espírito que move o noso club: un espazo para facer comunidade, medrar xuntos e comprobar que a literatura esténdese moito máis alá das aulas. Co recordo dos poemas compartidos baixo o sol de San Simón, despedímonos agora si ata o vindeiro curso. 

¡Grazas a todos por facelo posible e feliz verán!

Letras Galegas 2026: a luz e a voz de BEGOÑA CAAMAÑO

 A celebración das Letras Galegas 2026 encheu de vida os corredores do centro cunha sentida homenaxe á escritora, xornalista e activista Begoña Caamaño. Esta muller exemplar, cun fondo compromiso feminista e profesional na Radio Galega, revelouse como unha narradora extraordinariamente madura con novelas tan sobranceiras como Circe ou o pracer do azul e Morgana en Esmelle, onde nos ensina a ler os mitos cunha ollada feminina.

Para achegar a súa figura a toda a comunidade educativa, o alumnado de 2º de ESPA organizou diversas actividades arredor da autora. Despois de ler e analizar polo miúdo as súas biografías, deseñaron unha exposición sobre a súa vida e o seu activismo.

 

Grazas ao traballo deste grupo, a traxectoria e as obras de Begoña Caamaño presiden agora os corredores da EPAPU. Esta necesaria exposición convértese nunha homenaxe aberta que anima a todo o alumnado a descubrir e valorar o valioso legado literario que nos deixou.

O EDLG e "O dondo colo do vento" despiden o curso escolar con Comerás Flores de Lucía Solla

O curso escolar vai tocando ao seu fin e no club de lectura da EPAPU, "O dondo colo do vento", seguimos tecendo historias, compartindo reflexións , alimentando a alma e o estómago!

Nesta terceira e última sesión do ano, mergullámonos de cheo nunha das obras máis exitosas deste ano: Comerás flores  da escritora marinense Lucía Solla.

Para recibir a un grupo que non para de medrar e que cada día é máis participativo, preparamos un ambiente único: flores, froita e pasteis que adozaron unha tarde de debate vibrante, reflexións e moita complicidade literaria. É un auténtico luxo ver como este espazo se converteu nun punto de encontro tan vivo e acolledor para o alumnado e profesorado.

Aínda que esta foi a última xuntanza arredor do libro neste curso, a actividade do club non para. Como broche de ouro e antes de despedirnos ata o próximo ano, a vindeira semana viviremos unha xornada inesquecible: realizaremos un percorrido literario pola Illa de San Simón.

Queremos dar as grazas a todas e cada unha das persoas que formades parte de "O dondo colo do vento". Grazas por achegar a vosa sensibilidade, o voso tempo e a vosa ilusión a cada páxina.

O EDLG e "O dondo colo do vento" tecen lecturas con Emmanuel Carrère

 

No club de lectura da EPAPU, "O dondo colo do vento", seguimos tecendo historias e reflexións. Nesta segunda sesión, mergullámonos nunha das obras máis inquietantes e fascinantes da literatura recente: L'Adversaire (O adversario) de Emmanuel Carrère.

A lectura desta obra levounos moito máis alá da crónica negra. Partindo do caso real de Jean-Claude Romand, o home que mentiu á súa familia durante dezaoito anos antes de cometer o irreparable, o alumnado e o profesorado compartimos un intenso tempo de debate sobre o protagonista, o papel do narrador,  do autor e cuestionamos os  valores da sociedade actual.

O máis enriquecedor da xornada non foi só a análise literaria, senón a capacidade do alumnado para conectar os dilemas do libro coa propia condición humana. Nos encontros do club de lectura as páxinas son só a escusa para que a palabra circule libre e crítica.

Grazas a todas e todos os participantes por achegar a vosa visión e por facer desta sesión un espazo de reflexión tan profundo e necesario.

O mundo rima nas diferentes linguas do noso alumnado

 

O pasado 21 de marzo, as paredes do noso centro escoitaron versos e latexos...No marco do proxecto Tecendo Linguas, o alumnado de 2º ESPA e de Español para Estranxeiros uniron as súas voces nun recital plurilingüe que emocionou a todos os presentes.

A poesía, esa linguaxe universal que non entende de fronteiras, serviu de fío condutor para conectar as orixes de cada estudante. Escoitamos a música de versos en ucraíno, ruso, árabe, portugués, ingles e  castelán.

Pero o tear non quedou aí: as linguas de orixe entrelazáronse coa nosa, o galego, a través das verbas de grandes referentes como Celso Emilio Ferreiro e Manuel María, que compartiron espazo con Bécquer ou Lorca. Todo isto, envolto nunha atmosfera máxica grazas á música que acompañou cada declamación.

Queremos darlles as grazas a Irina, Mariia, Khadija (Jeddi), Hansa, Víctor, Wendwly, Alex, Jesús, Thomás, Sandra, Sara, María, Roberto, Dani, Luna, Jose e Érika por prestarnos a vosa voz, polo voso agarimo e por demostrar que a literatura está máis viva ca nunca.

Mentres haxa alguén disposto a recitar e alguén disposto a escoitar, o noso centro seguirá sendo un lugar máis humano, máis libre e, por suposto, máis fermoso.

Que viva a poesía e que viva a nosa diversidade!

Unha viaxe pola nosa historia: do Tesouro de Caldas de Reis a Castelao

 

O alumnado de 2º e 4º de ESPA da quenda de tarde desprazouse ata o Museo de Pontevedra para vivir unha xornada de inmersión na historia e na cultura galega. Unha visita que nos levou desde os inicios da nosa era ata o pensamento do intelectual que deseñou a Galicia moderna.

Coincidindo co 76 aniversario do seu pasamento en Bos Aires (7 de xaneiro de 1950), percorremos as salas dedicadas a Alfonso Daniel Rodríguez Castelao. Despois de ler e estudar as súas obras na aula, os alumnos e alumnas puideron ver de preto a pegada física do xenio de Rianxo.

A segunda parte da visita levounos moito máis atrás no tempo para admirar o Tesouro de Caldas de Reis (ou Depósito das Silgadas). Quedamos abraiados ante a maior acumulación de ouro da prehistoria europea!

Exposición "O galego tamén noutros mundos"

 

Este mes de marzo vivimos un momento moi especial no noso centro. No marco do proxecto Tecendo Linguas, que vimos desenvolvendo durante todo o curso para fomentar a convivencia e a diversidade lingüística, organizamos unha nova iniciativa: a inauguración da exposición "O galego tamén noutros mundos".

Por que esta exposición? Ás veces, na nosa rutina diaria, corremos o risco de pensar que a nosa lingua é algo só para usar na casa ou na clase. Cun alumnado tan diverso, era vital amosar que o galego non é unha illa, senón unha ponte.

O noso obxectivo é claro: queremos que todos e todas , os que naceron aquí e os que viñeron de fóra, sintan orgullo pola nosa lingua e, sobre todo, que valoren a súa utilidade e prestixio internacional.

Ao longo desta semana, as distintas clases foron visitando a mostra. Foi incrible ver as caras de sorpresa do alumnado ao descubrir que hai xente estudando galego en universidades de Oxford ou Berlín, ou ao ler que hai poetas estadounidenses que escollen a nosa lingua para escribir.

Con esta iniciativa, o proxecto Tecendo Linguas demostra que normalizar o galego tamén é amosar a súa cara máis aberta e global. 

A exposición pecha cun panel moi especial: "O galego tamén no meu mundo". Nese espazo, o alumnado pode interactuar, reflexionar e contarnos que palabra ou emoción lle regalarían ao mundo en galego. Porque o futuro do galego depende de nós, de que sexa unha ferramenta útil e viva nas nosas mans.