Benvidos ao curso 2026-2027!

 

Ola a todas e a todos!

Comeza un novo curso na EPAPU Río Lérez e, con el, retomamos este espazo de dinamización lingüística que tan boa acollida tivo o ano pasado. Se en 2025-2026 estivemos "Tecendo Linguas", descubrindo como se entrelazan os idiomas e as súas historias, este curso iremos máis aló.

Este ano queremos falar do que une os pobos máis alá das fronteiras e das linguas: a artesanía, os costumes, a gastronomía e as tradicións que nos fan humanos en calquera parte do mundo.

Porque por moi diferentes que sexan as linguas que falamos, todos os pobos teceron, cociñaron, celebraron e contaron historias arredor dun lume, dun tear ou dunha mesa. E iso é precisamente o que queremos tecer este curso no blog e nas redes: os fíos invisibles que conectan culturas distintas a través de xestos tan universais como facer pan, fiar unha manta ou celebrar unha festa.

O novo proxecto: "Tecendo pobos".

Ao longo do curso iremos publicando (e compartindo nas redes sociais do centro)
propostas arredor destes eixos:

• Artesanía do mundo: oficios tradicionais galegos e doutras culturas.

• Linguas e palabras viaxeiras: expresións que pasaron dun idioma a outro.

• Sabores que contan historias: receitas e costumes gastronómicos.

• Tradicións e festas populares: o que se celebra e por que.

• Costumes cotiás: xestos e obxectos que se repiten en pobos moi afastados entre si.

 Que teñades un curso cheo de aprendizaxe... e de moitos fíos por descubrir!

Descubrindo os segredos de Pontevedra

 O alumnado da ESPA  tivo a oportunidade de vivir unha xornada única polas rúas de Pontevedra. Cun tempo que nos acompañou en todo momento, realizamos unha visita guiada grazas á guía turística do Concello de Pontevedra, quen nos descubriu a cara máis emblemática, fascinante e, ás veces, oculta da cidade do Lérez.

O obxectivo? Aprender a ler a nosa historia a través das pedras, dos nomes das prazas e das lendas que forman o noso patrimonio cultural. 

Para moitos de nós, Pontevedra é unha cidade coñecida, pero este paseo amosounos que aínda garda segredos que o alumnado descoñecía por completo.

Quedamos fascinados coa arquitectura sacra da cidade, pero o que nos chamou a atención foi o detalle curioso das "lentes" na fachada da Basílica de Santa María a Maior. Sabías que hai unha figura con anteollos esculpida na pedra? 

O percorrido levounos polo corazón do centro histórico, un dos mellor conservados de Galicia, onde puidemos admirar os lugares máis emblemáticos da cidade. Desde a Igrexa da Peregrina e a espectacular fachada da Basílica de Santa María a Maior , ata as Ruínas de San Domingos, o alumnado viaxou no tempo a cada paso. Tampouco faltaron paradas con gran carga histórica e cultural, como a casa onde viviu Valle-Inclán.

Desde o Equipo de Normalización Lingüística queremos destacar o ben que o pasou o alumnado, que desfrutou ao máximo da experiencia mentres conectaba coas súas raíces. Esta actividade demostrounos, unha vez máis, que o galego é a lingua coa que mellor se entende o noso pasado e coa que debemos construír o noso futuro.

Coñecer a nosa historia en galego axúdanos a valorar máis o que somos. 

Illa de San Simón. Poesía e historia.

 Como colofón a un curso cheo de lecturas e complicidades, os integrantes club de lectura, "O dondo colo do vento", puxemos rumbo á illa de San Simón. Esta viaxe no corazón da ría de Vigo non foi unha simple excursión, senón un auténtico paseo de aprendizaxe, convivencia e posta en valor da nosa memoria cultural. Acompañados por unha xornada radiante, desfrutamos dun sol espléndido nesta paraxe tan singular.

Nesta xornada transformamos a Illa de San Simón en memoria viva a través da palabra. Nun ambiente de profundo respecto, fomos desfiando e recitando diversos poemas centrados na liberdade, a xustiza e a paz. As voces dos nosos lectores uníronse para dar vida aos versos de autores inesquecibles como Miguel de Cervantes, Xela Arias, Manuel María ou Celso Emilio Ferreiro, cuxo eco resonou con forza fronte ao mar.

Esta última actividade deixa testemuño do espírito que move o noso club: un espazo para facer comunidade, medrar xuntos e comprobar que a literatura esténdese moito máis alá das aulas. Co recordo dos poemas compartidos baixo o sol de San Simón, despedímonos agora si ata o vindeiro curso. 

¡Grazas a todos por facelo posible e feliz verán!

Letras Galegas 2026: a luz e a voz de BEGOÑA CAAMAÑO

 A celebración das Letras Galegas 2026 encheu de vida os corredores do centro cunha sentida homenaxe á escritora, xornalista e activista Begoña Caamaño. Esta muller exemplar, cun fondo compromiso feminista e profesional na Radio Galega, revelouse como unha narradora extraordinariamente madura con novelas tan sobranceiras como Circe ou o pracer do azul e Morgana en Esmelle, onde nos ensina a ler os mitos cunha ollada feminina.

Para achegar a súa figura a toda a comunidade educativa, o alumnado de 2º de ESPA organizou diversas actividades arredor da autora. Despois de ler e analizar polo miúdo as súas biografías, deseñaron unha exposición sobre a súa vida e o seu activismo.

 

Grazas ao traballo deste grupo, a traxectoria e as obras de Begoña Caamaño presiden agora os corredores da EPAPU. Esta necesaria exposición convértese nunha homenaxe aberta que anima a todo o alumnado a descubrir e valorar o valioso legado literario que nos deixou.

O EDLG e "O dondo colo do vento" despiden o curso escolar con Comerás Flores de Lucía Solla

O curso escolar vai tocando ao seu fin e no club de lectura da EPAPU, "O dondo colo do vento", seguimos tecendo historias, compartindo reflexións , alimentando a alma e o estómago!

Nesta terceira e última sesión do ano, mergullámonos de cheo nunha das obras máis exitosas deste ano: Comerás flores  da escritora marinense Lucía Solla.

Para recibir a un grupo que non para de medrar e que cada día é máis participativo, preparamos un ambiente único: flores, froita e pasteis que adozaron unha tarde de debate vibrante, reflexións e moita complicidade literaria. É un auténtico luxo ver como este espazo se converteu nun punto de encontro tan vivo e acolledor para o alumnado e profesorado.

Aínda que esta foi a última xuntanza arredor do libro neste curso, a actividade do club non para. Como broche de ouro e antes de despedirnos ata o próximo ano, a vindeira semana viviremos unha xornada inesquecible: realizaremos un percorrido literario pola Illa de San Simón.

Queremos dar as grazas a todas e cada unha das persoas que formades parte de "O dondo colo do vento". Grazas por achegar a vosa sensibilidade, o voso tempo e a vosa ilusión a cada páxina.

O EDLG e "O dondo colo do vento" tecen lecturas con Emmanuel Carrère

 

No club de lectura da EPAPU, "O dondo colo do vento", seguimos tecendo historias e reflexións. Nesta segunda sesión, mergullámonos nunha das obras máis inquietantes e fascinantes da literatura recente: L'Adversaire (O adversario) de Emmanuel Carrère.

A lectura desta obra levounos moito máis alá da crónica negra. Partindo do caso real de Jean-Claude Romand, o home que mentiu á súa familia durante dezaoito anos antes de cometer o irreparable, o alumnado e o profesorado compartimos un intenso tempo de debate sobre o protagonista, o papel do narrador,  do autor e cuestionamos os  valores da sociedade actual.

O máis enriquecedor da xornada non foi só a análise literaria, senón a capacidade do alumnado para conectar os dilemas do libro coa propia condición humana. Nos encontros do club de lectura as páxinas son só a escusa para que a palabra circule libre e crítica.

Grazas a todas e todos os participantes por achegar a vosa visión e por facer desta sesión un espazo de reflexión tan profundo e necesario.

O mundo rima nas diferentes linguas do noso alumnado

 

O pasado 21 de marzo, as paredes do noso centro escoitaron versos e latexos...No marco do proxecto Tecendo Linguas, o alumnado de 2º ESPA e de Español para Estranxeiros uniron as súas voces nun recital plurilingüe que emocionou a todos os presentes.

A poesía, esa linguaxe universal que non entende de fronteiras, serviu de fío condutor para conectar as orixes de cada estudante. Escoitamos a música de versos en ucraíno, ruso, árabe, portugués, ingles e  castelán.

Pero o tear non quedou aí: as linguas de orixe entrelazáronse coa nosa, o galego, a través das verbas de grandes referentes como Celso Emilio Ferreiro e Manuel María, que compartiron espazo con Bécquer ou Lorca. Todo isto, envolto nunha atmosfera máxica grazas á música que acompañou cada declamación.

Queremos darlles as grazas a Irina, Mariia, Khadija (Jeddi), Hansa, Víctor, Wendwly, Alex, Jesús, Thomás, Sandra, Sara, María, Roberto, Dani, Luna, Jose e Érika por prestarnos a vosa voz, polo voso agarimo e por demostrar que a literatura está máis viva ca nunca.

Mentres haxa alguén disposto a recitar e alguén disposto a escoitar, o noso centro seguirá sendo un lugar máis humano, máis libre e, por suposto, máis fermoso.

Que viva a poesía e que viva a nosa diversidade!